Luke 9

1Nwyihoi Yesu wa yi owo abara zhi nnaba gmanyi, wa ga ɓa iko tu alijenu tukwo, ɓa kun ɓa ya ɓa ka nyasan doho-dohoi gna. 2Wa tnu ɓa ɓa lo ntu ge ɓa zhin Shekwoyi ebemi wazi ɓai ka anyasan yi gna.

3Wa gna ɓa ge ɓa to la busi, ko pwakun, ko nyagyi, ko agyiwye ko aje ngun aba m. 4Puwa nfya lo fya ku bwa fi ɓo nu har fya fa ezhi-hi.

5Aba nfya lo to a gwo fye m, fya fa ezhi-hi, fya abutuku luya zhi ɓa nfye apita. 6Abara ɓa lo ɓai zhin wazi n na zhigba laɓa, ɓai ka aza gna.

Ca Wo Hirudis Nnazajei

7Hirudis Sa-galili yi, wa wo aɓo nɓa ɓo zhin wa ku jeje, ntu ge azaho ɓei ci ge Yohanna batizma zhin-yi nu la laka n vingwo. 8Azaho ɓa gna iliya nu, azaho ge anabi kwo-kwoi ho nu la jezeɓe, ai da laɓa.

9Hirudus wa ci ge, “Ai nɓei la Yohanna tukwo kpeya, nyikanu n zadeye yi nmi wo owo nabari nyi a?”

10Abara ɓa jezezhi ɓa wu Yesu lafiya aɓo nɓa ku zhin, wa ku ɓa ɓa lo Besaida. 11Ama aza ɓei ku kpe aba nwa lo, ɓa vi wo lo: Wa gwo ɓa wa ya ɓa nya wu tu Shekwoyi ebemi tukwo, woi ka anyasan yi gna.

12Wyeshei la ya kwoi she, abara awo-cei-aba ɓa ɓe ɓa gna wo ge, wo ku aza gnami ɓa lo ɓo zan nyagyi shin ɓedo nna gyewan ba yi nna kauye, “Ntu ge nyaho to lo n zhabui ye a gyi m.”

13Yesu wa gna ɓa ge “fye ga ɓa nyagyi;” Ɓa ci Yesu ge, “Ai yi to n nyahoi shi lo ndu bured; ngun-atnu nna bmiya yi ngun-aba m, ko ho ye ge yo si ɓe cei nu ntu begye ye ɓo a?” 14Aza ɓei nyi ngye dubu ngun atnu nu (5,000), Yesu wa gna ge, “Fye gna aza ɓa ku sase zhi shitnu-shitnu (50–50).” 15Aza ku sase zhi lo nu.

16Yesu wa gwo buredi ngun-atnu hi ɓedo abmiya yi ngun-aba, wa kpe awye wu nshe wa zhin godiya; wa sa ko ya waga wo abara ɓa gna azayezhi. 17Aza vinya ɓa ku gyi aku ɓa kun, awyiwoyi nna ɓei yezhi ɓa ku nu acekun awo-cei-aba.

18Nwyihoi woi gni nwo gmanyi-i, nwo abara yi woi zhin aduwa. Wa ɓe wa nya ɓa ge, “Aza gna ge mi zhin nyikado nu a?”

19Ɓa gna wo ge, “Yohanna batizma zhin yi ko Iliya, azaho ɓa gna ge, anabi kwo-kwoyi ho nu la laka n vingwo.” 20Wa nya ɓa ge, “Fyehin ma fye gna ge mi zhin nyikado nu a?” Bitrus wa ciwo ge. “Ho nu zhin Masihu Shekwoyi nya.”

21Wa tu ɓa gbe ge ɓa to gna zaho-zaho yi m. 22Wa ci ge, “Oza Nugun ɓa sin wahala nmwa, a Yahudiyi atukwoda ɓa na wo aɓo, ɓedo amalami dnagmayi nna awa yekpeyi, ɓa wu wo, nyipyeyi tahi wo ɓei je wye-wyeyi bwa.”

23Wa je ɓa gna ge, “Oza nwo ɓa vi mi, tile wa na wohin tukwo ɓo wa la wohin zundu fyegyi-fyegyi wa vi mi. 24Oza nwa bwi wohin wye-wyeyi ntu mi ɓo, wo ɓa bwa ko, ama oza nwo ye wa shi kwo, kwo ɓa wo bwi. 25Mi gye gyiba nza ɓa bwa, ndei oza ku anyi nya bwa vinya ama ntna wohin wye-wyeyi?

26“Omi Masihu, sa ma ɓe cei dna nmimwa-mwa nmi Dada mwa-mwa yi nmi amalaika gyi-gyi-yi, nɓei wo aza vinyikwo nɓa wo mi ɓeda vinyikwo lo nsayi ye nyi. 27Ma gna fye gaiciya, aza zhi lo ya nfye mi nɓa ta fim, sai ɓa ku gye Shekwoyi ebe.”

Yesu Dna Nwo Mwa-mwa

28Anyipyei nyimwa-nyimwa avun wa la Bitrus n Yakubu yi ɓedo n Yohanna yi, wa gun lo ope nɓai ɓa zhin aduwa. 29Shi wo ɓei tu woi zhin aduwa, ɓa gye owo awyeba ɓai bmiyana owo aje ɓa ku wu n bui-bui pau. 30Safyewyi aza ngun aba ɓa ɓe ɓai daɓo nwoi, Musa n Iliya yi. 31Ɓa ɓei n mwa-mwa eshe nyai kpe, ɓa ɓei daɓo ntu owo fi ɓo nu nkwo ɓa zhin Urushelima nyi, shi Shekwoyi wa zhin shiri.

32Ogye ɓei zhin Bitrus ɓedo n nazajei, ɓa ɓei kun agyewyi ɓa gye Yesu tu n buzangna yi n mwa-mwai, n nazayi zhi nwoi ngun-aba.

33Musa n Iliya yi ɓai ye ɓa kuka, Bitrus wa ku je-je to wa kpe ɓeye nwo dam, wa ci ge, “Shekwomwasa ko ɓa bmiya ya kpe alubui zhi ya ngun-ata, gmanyi ntu ho ɓo, gmanyi ntu Musa ɓo, gmanyi ntu Iliya ɓo.”

34To woi zun ɓeda yam, onyi kwa shin zhin kwa pwi ɓa, ɓa wo odna shi ɓa ɓei lo fi n onyihi. 35Begye kwa gmi n onyihi ge, “Omi Nugun nu nyi, omi za kni-kni-yi fye wo wo.”

36Shi begye ɓei ku ɓo zo a, ɓa gye Yesu nu bwa cetu ɓedo nɓai. To ɓa gna zaho-zaho yim har esa kwa.

Yesu Wa Ka Oɓi Gna

37Ofye kwa gyi woi la kashi npe, azayezhi ɓa ɓe Yesu aba. 38Ozadoho dna azayezhi wa ta begye n kalai wa gna, “Male, oɓi ye nu bwa mi nugun zhin gmanyi, 39alijenu yi gni ɓai wan wo, ɓai zhin wo woi fi aku, ɓai she wo ya ɓai gna wo gna-gna har woi pui afugya ngbe, kwo zhin kwa zun wo kni kwa fa wo ya zhi. 40Mi-i gyi ho abara wye ge ɓa kun alijenu ya, to ɓai mi m.”

41Yesu wa ci ɓa ge, “O aza tna gaiciya ga yi, nɓa sun esa nwuna nu nfyei a? Fye ɓe woi ya.”

42Shi oɓi hi ɓei ɓe, alijanu ɓa la wo ɓa zun wo nkni via, ɓa ga wo wahala. Ama Yesu wa gna alijenu ge ɓa kun nwo, wa ka ɓihi gna wa la wo wa wo ga wo dada.

43Ca wo aza ntu Shekwoyi iko ɓo. Ɓai ye bwa zhi cei wo ɓa, Yesu wa gna wo abara ge. 44Fye wo ɓo nmi ye ma da nyi, fya pa kwo ɓo. A ye lo a ga oza Nugun nnaza akun. 45Ama to ɓa kpe ɓeye nwo dam, ntu ge a ɓei la kwo so shi ɓa odna ku ɓa wo to zaho-zaho wa nya wo ɓo m.

46Aɓona laka dna nwo abara atan-tasin, kwo nyikanu nɓa mi ɓei zhin zadnagmayi vinya nɓa mi a?

47Yesu wa ku kpe ɓeye nɓa da, wa yi ɓi nawyi ho ɓe cei nwo aba. 48Wa gna ɓa ge, oza nwa gwo oɓi nawyi ye dna nmi eye, wo gwo mi nu, oza nwa gwo mi, wo gwo oza nu nwa tun mi nyi. Oza nwo zhin oza nawyi owo nu ɓa zhin oza dnagmai.

49Owo bara Yohanna wa ci ge, Dagayi ya gye zaho woi kun alijenu ya dna nho eye, yi-i gna wo ge wo la fa, ntu ge wo to dna lo n yi nu m.

50Yesu wa ci wo ge, To fye-e zhin lo nu m; ntu ge oza nwo ta zhin gaba nfyei m, wo zhin fye nya nu.

51Shi esa ɓei la wu vi-vi nwo ɓa jeze lo eshe, wa bugba shi wa lo Urushelima.

52Wa tnu aza ɓa lo a Samariyayi kauye, ntu ge a ga wo aba wa zhin anya shiri. 53To aza n kauye yi ɓa gwo ɓa m, ntu ge ɓa ɓei n nawyei wu n Urushelima.

54Shi Yakubu n Yohanna yi ɓei gye lo nu, ɓa nya Yesu ge “Ho ɓa ye ya gna atnu n nai nshe kwa gyi ɓa?” 55Ama Yesu wa gnakni ɓa, 56ɓa lo kauye do. 57Ɓai lo nzan yi, zaho wa gna Yesu ge, nɓa vi ho abaho-bahoi n ha lo.

58Yesu wa gna wo ge, “Acamcam n nabwo yi lo ɓai fi, alu nɓa ama yi lo, amma omi Masihu mi to n napi yi lo n anyi yem.”

59Nsadohoi wa yi zaho ge wa ze wo bara, wa ye amma wa gna ge sai owo dada la fi kpa.

60Yesu wa gna wo ge, “Fwa aza afifi yi ɓa bi aje. Amma oho tnu-tnu ha ɓe ha lo ho da Shekwoyi ebemi nabari.”

61Zadoho wa gna wo la ye, amma Dagayi wo fwa wo gna aza ami nwo puwa kpa. 62Yesu wa gna ɓa ge, “Oza nwa fwa aza ɓa pmi wo ya ntnu-tnu nmi cei zhin shiri ntu wo ɓo nyi, wo to kunce lo n Shekwoyi ebemi yim.”